Den kuadro di e koperashon ku tin entre di VKC i Marina Real, resientemente e commandant di Marinierskazerne Suffisant Majoor Enrique Sanchez huntu ku su Promé Ofisial Kapitein Ramakers a hasi un bishita di trabou na VKC.
E delegashon di Marina Real a ser risibí pa Commandant di VKC, Majoor Eugene Middelhof i su team di Maneho. Durante e akto ofisial di hisamentu di bandera commandant Majoor Enrique Sanchez den un diskurso a aksentuá e importansia di un bon koperashon entre di Marina Real i VKC. E'la felisitá un biaha mas e commandant di VKC i su team di Maneho i a sigurá ku Marina Real lo trata huntu ku VKC pa logra e metanan ku e team di Maneho nobo a establesé. Pa e aña aki i tambe pa e próksimo aña tin un par di ehersisio ku ámbos kuerpo lo hasi huntu i kaminda Marina Real lo pone ekpertisio i materialnan nesesario na disposishon di VKC.
Komo muestra di e koperashon aki commandant Majoor Enrique Sanchez a hasi entrega di un set di "Rugtas" ultra moderno ku boluntarionan di VKC por usa durante nan e diferente ehersisionan.
Despues di e akto ofisial aki e delegashon di Marina Real a hasi un rekorido pa sera konosí ku tur e diferente departamentonan di VKC i tambe otro instalashonnan pa nan haña un bista kon e operashon di VKC ta funshoná.
E delegashon di Marina Real na final a ekspresá nan apresio pa e manera serio i profeshonal ku VKC ta funshoná.
