• VKC a habri aña ku un Santu Sakrifisio di Misa
Djadumingu último, dia 9 di yanüari, VKC a habri aña ku un Santu Sakrifisio di Misa na Suffisant, kaminda pastor Morrison Laporte a bendishoná e miembronan di kuerpo. Despues di misa, komandante Mayor E. Middelhof a hasi entrega di mas ku 40 sertifikado di e miembronan ku a pasa e kurso di “Buitengewoon Agent van Politie” ku éksito. VKC ta spera ku pronto, nan por wordu hurementa dor di Ministro di Hustisia komo Agente Ekstra-Ordinario, pa sina’ki por yuda kombati kriminalidat den nos pais.Tambe tabata tin promoshon, kaminda a promové sinku miembro den un rango mas haltu. Ta trata aki di promé Teniente Elias, ku a promové pa kapitan, Sargento - mayor Pinedo i Sargento - mayor Puchi ku a bira Atjudant, Sargento Koffie a bira Sargento Mayor i Balentien ku a bira Sargento. CVKC a elogiá dos miembro pa nan trabou ku a destaká durante e aña ku a pasa. E miembronan ta Tltn. M. Romero, pa su dedikashon na bureau opleidingen i Adj. T. Smith pa su dedikashon kom PC.
Riba e pòrtrètnan nos por wak kaminda algun di e miembronan ta risibí nan sertifikado, e 5 miembronan ku a wòrdu promové i tambe kaminda miembronan ta risibí bendishon di pastor Morrison Laporte.
En Memoriam: 2ndo Teniente F. Bemmel
Djadumingu último, dia 23 di yanüari, VKC a tuma despedida di un kolega miembro, F.J.A. Bemmel, segundo teniente di e kuerpo. Teniente Bemmel a sirbi su pais kasi 50 aña, komo ku e a drenta VKC na aña 1961.Bemmel tabata konosí komo un miembro ehemplar, duru, pero semper ku rèspèt pa otro. Su dedikashon na e kuerpo tabata inmenso, i e a dediká hopi di su ora nan liber na e kuerpo. E tabata stima su muzik i tabata guia pa hopi tempu e drumband di VKC. E tabata karga e medaya di “Ridder in de orde van Oranje Nassau”, medaya “Honor i Merito”, “Trouwe dienst – goud” di V.K.C. i tambe e a risibi e medaya di “4-daagse Nijmegen” ku e a kana. Teniente Bemmel a wòrdu hiba na su último lugá di sosiegu ku honor di e kuerpo, ku ta enserá e seremonia ofishal di entiero, ku un peloton di tiru, drùmbènt i harmonia.
• VKC ta sigui kurso di instrukshon kontra violensia
Den su afan pa ainda profeshonalisá mas, resientemente dos instruktor di VKC a pasa un kurso “Beteugelen van Woelingen” kual a tuma lugá na kazèrne di marinir na Savaneta Aruba.
Durante e kurso aki kual a dura 3 siman, a trein intensivo riba diferente parti ku ta importante ora di enfrenta disturbio i lantamentu. Aki tin ku tene kuenta ku violensia ta e ultimo rekurso ku lo wordu usa den e kaso nan aki.
E kursonan a wordu duna dor di instruktornan di Koninklijke Marechaussee na e marinirnan na Savaneta Aruba, i komo VKC tin un akuerdo di koperashon ku Marina Real, VKC ta tin e oportunidat pa laga algun miembro partisipa den e kurso aki.
Pa un idea visual di e treinen por wak riba:
http://www.youtube.com/watch?v=I2Ms5NBqPcg
• Treinen pa Karnaval
For di desèmber ùltimo, VKC ta preparando pa ta optimal pa e temporada di Karnaval. Manera ta konosí, VKC ta yuda Polis tur aña durante e marchanan di Karnaval.
E añ' aki esey tambe lo ta e kaso. Ta tin treinen intensivo, kaminda tur miembronan a partisipá. Entre otro a trein uso di "wapenstok", konosí komo "klop", defensa propio, tira ku arma reglementar i otro tipo di treinen. VKC ta pidi tur hende pa kopera durante e marchanan i no stroba ni e marcha, ni e funshonarionan ku ta hasi nan trabou.
Ko-fundador di VKC Jose Maria "palu Djo" a bai sosegá
Djasabra dia 26 di Mart ultimi, e tristu notisia a yega VKC ku e ko-fundador i eks boluntario Jose Maria "palu Djo" a bai sosegá.
Palu Djo a yega e edat di 101 aña. Manrea ta konosi, Palu Djo komo hoben tabata den e grupo ku a lanta VKC na 1929 bou di direkshon di Shon Cai Winkel. Palu Djo tabata hopi aktivo komo periodista i tambe komo fotografo.
Un karera largu, skèrpi i konosi pa su kartanan na "pueblo na palabra".
Nos sinsero kondolensia ta bai na e famianan di Palu Djo. Sergeant-Major, sosegá na pas!
Adspirantnan 2010-2011a kaba ku "paseo kayente"
Aña pasa, pa ta eksakto na sèptèmber, a kuminsá un kurso básiko ku a kaba 2 siman pasa, ora e grupo a pasa nan bivak asina yama “Paseo kayente”, kaminda den un wikènt nan mester a usa tur kos den práktiko lokual ku nan a siña i tambe demonstrá nan disiplina. Ta un total di 23 persona a logra hasi esaki, for di un grupo di 117 inskripshon, di lokual 35 a wòrdu selekshoná pa sigui.
• VKC ta kuminsa rekutá miembro durante "Vlootdagen"
Den wikent di 21 i 22 di mei proksimo, Marina Real i Warda Kosta ta organisa e konosi "Caribische Vlootdagen" na Punda i Otrobanda. Manera ta kustumber, VKC tambe lo tey e dianan ey ku un stent pa kuminsa rekuta miembro nobo pa e kurso basiko kual lo start Yanuari 2011.
Tur hende ku ta interesa lo por pasa pa haña informashon kon por bira miembro, inskribi, papia ku algun miembro ku a kaba e kurso resien i tambe wak promoshon riba video. Tambe lotin un show di E.B.T., Showpeloton i drumband. VKC ta orguyoso ku a wordu pidi e aña'ki pa yuda tambe ku vigilansia, huntu ku Marina Real i Marechaussee
VKC ta trein na Boneiru
Den luna di Mei, pa ta eksakto di 9 pa 16 di Mei, un grupo di 16 miembro di VKC a partisipá den un treinen huntu ku CLAS-Cie. (Undidatnan di Ehérsito Real di Hulanda, situá aki na Kòrsou) na Boneiru. E treinen aki ta kai den e kuadro di e asina yama “akuerdo di koperashon” entre VKC i Marina Real.
Ku e barku di Marina Real HMS Pelikaan, e trupanan a sali rumbo pa Boneiru dia 9 di mei, kaminda despues di 4 ora nan por a desembarká na Kralendijk. Djei nan a bai rumbo pa mondi, kaminda a lanta un kampamentu ku a fungi komo pòst sentral.
E miembronan di VKC a partisipá den diferente treinen, entre otro kombatimentu di disturbio, aktuashon durante un kalamidat i tambe nan tabata “enemigu” ku mester a wòrdu kapturá dor di e timnan di e forsa Real. Nan a traha huntu ku e tim speshal di Polis di Boneiru i mester a “ataka” diferente opheto ku tabata wòrdu protehá. Den e treinen aki miembronan di VKB tambe a partisipa.
Den e último dianan VKC a yuda ferf un lugá den Washington Park komo obra di karidat, kual a wòrdu apresiá dor di e tim di Stinapa.
Dia 16 di Mei e tim a nabegá bin bek, kansa pero satisfecho ku e treinen. E treinen a duna e miembronan di VKC pa sinja hopi aspekto, ku por wordu aplika tambe, ora tin un situashon di un kalamidat na Korsou. Mando di e tim di forsa Real tabata sumamente satisfecho ku e tim di VKC su seriedat i profeshonalismo ku nan a desplega.
Kurso pa “Hoofdschietinstructeur”
Luna pasa 4 miembro di VKC a sigui un kurso intensivo di tres siman pa bira “Hoofdschietinstructeur”, instruktor di tiru. Esaki a tuma lugá na Marinierskazerne Savaneta na Aruba. Miembronan di CurMil, Kustwact, VKS i VKE tambe a sigui e kurso aki. E kurso a bira posibel pa motibu di e akuerdo di koperashon entre Marina Real i VKC.
Tur 4 miembro a pasa e kurso i a bira “Hoofdschietinstructeur” i ta awor instruktor sertifiká pa e pistol GLOCK 17 i arma DIEMACO C7A1. Tambe nan ta responsabel pa organisashon i seguridat na e kancha di tiru.
Maneho di VKC ta pa profeshonalisá e kuerpo dor di hinka tempu, energia i uso di diferente artefaktonan den enseñansa di su miembronan, pa asina VKC por ehekutá su tareanan na e manera mas profeshonal posibel.
Sergeant Fullinck, Sergeant Coffie, Sergeant-Majoor Windster, Adjudant Leito
• VKC su tradishonal "mars door de stad" tabata un eksito
VKC a tene su tradishonal marcha den kayanan di Willemstad. E aña aki a selebra 82 aña di eksistensha di e kuerpo.
E marcha a kaba na Plasa Brion kaminda a risibí S.E. Gobernador di Kòrsou Mr. Frits Goedgedrag i tambe sr. Minister Presidente di Kòrsou, sr. Gerrit Schotte.
Ambos a entrega e dia aki medayanan di fiel servisio di shete aña i mei, diesinku aña i bintisinku aña i tambe a entrega e medaya di kambio di struktura estatal, e medaya di 10-10-2010 na un deputashon di nos miembronan, ku tabata eksisti di Adjudant Poulina ku e aña'ki lo hasi 50 aña den nos kuerpo, 1ste klas Sprockel representando e damanan den nos kuerpo i komandante Mayor Middelhof represando e kuerpo total. Tambe a promove dos persona den un rango mas halto, esta Sergeant Schotborg pa Sergeant-Majoor i Korporaal Meulens pa Sergeant. E adspirant nobo nan tambe a wordu inougura na Brionplein.
E medaya di 10-10-2010
Un medaya ku a wordu traha i aksepta ku "landsbesluit" pa rekordá e kambio di e struktura estatal na oktober di aña 2010. Tur miembro di kuerpo ku tabata aktivo den e aña 2010 a bini na remarke di e medaya aki.
VKC ta selebra 82 aña di eksistensia.
Dia 23 di Yuni ultimo, VKC a selebra su di 82 aña di eksistensia. A konmemora Kolonel C. N. Winkel, fundador prinsipal di e organisashon, ku ponementu di krans di flor na su busta situa na entrada di Fort Amsterdam.
Tabata presente S.E. Gobenador di Korsou Mr. Frits Goedgedrag, Sr. Minister Presidente Gerrit Schotte, Komandante reemplesanta di Marine Real den Karibe Kol. J. Van Zaalen, Famia Winkel i Komandante VKC Maj. E. Middelhof, i mas invitadonan.
Djasabra 25 Yuni tabata tin e tradishonal "mars door de stad" ku a finalisa na Plasa Brion. Akinan a entrega medaya di fiel servisio na esnan ku 7½ aña, 15 aña i 25 aña di servisio. Ademas a entrega tambe e medaya di rekuerdo di Status Aparte di Korsou 10 di oktober 2010 na tur miembro ku tabata aktivo e temporada ey.
A promove Sgt. Schotborgh pa Sgt-Majoor i Korp. Meulens a risibi e strepi nan di Sergeant.
Despues di esakinan a instala e miembro nobonan, 24 na tur ku a risibi nan emblema di baret for di man di prome minister Sr. Gerrit Schotte. Un pabien na nan tur!
Entrega di Medaya Loyalidat
Resientemente VKC a entrega e medayanan di loyalidat (trouwe dienst) na e miembronan ku a kumpli 7½ aña, 15 aña i 25 aña den servisio di VKC. Aunke ku ta kustumber pa hasi esaki durante di "korpsverjaardag" e aña aki e programma tabat hopi yen ku a opta pa entraga esaki na un otro okashon. E portretnan ta duna un idea di e miembronan ku a risibi nan medaya.
Bishita di Commandant nobo di MK Suffisant
Na ougustus ultimo, Majoor Leiftink a hasi un bishita na VKC. Esaki pa informa su mes di e tareanan di e nos kuerpo i tambe pa introdusi su mes na nos organisashon. Despues di "vlaggenparade", CVKC Majoor E. Middelhof a duna un presentashon na e delegashon i pa despues a duna un paseo na tur departamentu di VKC.
Kapitein Celso A. Hernández a bai sosega
VKC a risibi e tristu notisia ku Kapitein (b.d.) Celso Hernández a bai sosega. Kapitein Hernandez tabata un di e motornan tras di re-aktivashon di VKC na 1961. Kapitein tabata hopi respetá den kuerpo i un personan amabel i strèt, segun algun miembronan ku a sirbi huntu ku ne den kuerpo.Kapitein lo wordu hiba su ultimo luga di sosiego ku mitar honor militar.
Nos ta desea famianan forsa ku e gran perdida aki.
Su Mahestat La Reina Beatris ta yega Korsou
Dia 1 di November ultimo a yaga Korsou su Mahestat La Reine Beatris pa un bishita ofisial. La Reina a sali for di Aruba pa Korsou, kaminda unidatnan di Landmacht ( Bravo-compagnie), CurMil i VKC a duna honor na su yegada.E Peloton tabata na enkargo di Tlnt A. Busby. Un tremendo presentashon di parti VKC!
Minister di Hustisia ta bishitá VKC
Dia 4 di Desèmber ùltimo Drs. Elmer "Kadè" Wilsoe, minister di hustisia di Kòrsou, a hasi un bishita na kuerpo pa orienta su mes riba e tareanan di e kuerpo. Sr. Wilsoe a wòrdu risibí dor e kuerpo segun e protokol di seremonia, pa despues e hasi inspekshon di e trupa.
Komandante Mayor E. Middelhof a yama sr. Wilsoe bon biní i sr. Wilsoe a hiba algun palabra.
Tambe algun miembro di e kuerpo a huramentá komo polis ouksiliar (BavPol) dilante e minister i e trupa.
Mayor Middelhof a duna un presentashon tokante e kuerpo pa despues pasa na e diferente departamentunan pa sera konosi.
Un sorpresa grandi pa Sr. Wilsoe ora e a sera konosí ku e miembro ku mas edat ku ketu bai ta aktivo, esta Adj. Poulina ku tin aktualmente 92 aña. Tambe Sr. Wilsoe a saka portret ku algun miembro ku lo kumpli 50 aña den fiel servisio di e kuerpo.
Sargento Renfrum a risibí sertifikado.
Na Novèmber ùltimo, Komandante Mayor E. Middelhof a entregá un sertifikado di gradisimentu na Sargento F. Renfrum, pa su dedikashon i pashon pa e kuerpo. Sargento Renfrum a drenta VKC na 1981 i keda aktivo pa basta tempu. Lamentabelmente dor di su salú e mester a stop di ta aktivo den e kuerpo. Sargento Renfrum tabata hopi kontentu e e gesto aki di parti di VKC.
